Македонски народен театар

Претставата „Важно е да се викаш Ернест“ на Хрватско народно казалиште од Загреб ќе гостува на сцената на МНТ во Скопје на 29 и на 30 јануари. Постановката е работена по истоименото дело на Оскар Вајлд, а режисер е Томислав Павковиќ. Станува збор за хумористична приказна за едно момче со двоен идентитет, кое ги избегнува општествените и социјални обврски, живеејќи слободен живот. Со претставата, која премиерно беше изведена 2007 година и доби многубројни позитивни критики, продолжува соработката меѓу МНТ и Хрватското народно казалиште, почната пред три години. Директорот на МНТ, Сашо Миленковски, очекува голем интерес за претставата, особено што во неа играат актери кои се познати и надвор од Хрватска. - Актерската екипа е одлична, нема уметник што игра во поставката да не е познат и успешен, што дополнително мотивира да се погледне претставата - вели Миленковски. Актерската екипа ја чинат Душан Бучан, Лука Драгиќ, Бранка Цвитковиќ, Зринка Цвитешиќ, Олга Пакаловиќ и други. Миленковски вели дека поради рецесијата лани МНТ не гостувал во Загреб, а веројатно нема да гостуваат ниту оваа година. Миленковски ги најави и новите проекти што ги подготвува театарот. Во тек е подготовката на претставата „Суд“ по истоименото дело на Коле Чашуле во режија на Љупчо Георгиевски, чијашто премиера е закажана за почетокот на февруари. Се подготвува и „Десет песни за Марија“, претстава која ја подготвуваат Дејан Дуковски и режисерот Санде Лопечиќ. Претставата е копродукција на МНТ и „Ноекелн опера“ од Берлин. Се работи за постановка во која, освен актерска игра, има танцување и пеење, што ја доближува до мјузикл. Во неа ќе учествуваат тројца македонски актери. - Во Македонија има многу актери кои одлично пеат и кои одлично би се вклопиле во мјузикл. Оваа поставка ќе ги воведе во поинаков театар од тој што го има кај нас - во театар со повеќе музика - најави Миленковски.